Названая новая верагодная дата абмену палоннымі паміж Расіяй і Украінай

Працэс абмену ўтрыманымі асобамі паміж Расіяй і Украінай, магчыма, будзе запушчаны да канца гэтага тыдня. Пра гэта паведамілі «Інтэрфаксу» ў сераду дзве дыпламатычныя крыніцы.
«Абмен можа пачацца да канца тыдня, верагодная дата — 7 верасня», — сказала «Інтэрфаксу» дыпламатычная крыніца.

Тым часам, іншая дыпкрыніца, пацвердзіўшы, што абмен запланаваны на суботу, адзначыла, што дамоўленасці носяць папярэдні характар. «Пакуль дасягнуты толькі рамачныя дамоўленасці. Канчаткова дату і ўмовы абмену бакі ўзгодняць ў сярэдзіне тыдня», — сказала яна.

У Крамлі між тым устрымаліся ад каментароў у сувязі з паведамленнямі аб тым, што абмен вязнямі паміж Расіяй і Украінай можа пачацца 7 верасня.

«Тэма адчувальная. Анонс тут быць не можа», — сказаў «Інтэрфаксу» прэс-сакратар прэзідэнта РФ Дзмітрый Пяскоў. Ён паабяцаў: «Факт стане вядомым».

Прэзідэнты Расіі і Украіны Уладзімір Пуцін і Уладзімір Зяленскі двойчы падчас тэлефонных гутарак абмяркоўвалі сітуацыю з утрыманымі асобамі. Размовы адбыліся 12 ліпеня і 7 жніўня.

У сярэдзіне ліпеня упаўнаважаны Вярхоўнай рады Украіны па правах чалавека Людміла Дзянісава і ўпаўнаважаны па правах чалавека ў Расіі Таццяна Маскалькова абмяняліся спісамі зняволеных у Расіі і Украіне. У спісе ад украінскага амбудсмена значылася 150 чалавек, у спісе расійскага амбудсмена — 34.

Пазней прэс-сакратар генпракурора Украіны Ларыса Сарган сказала пра падрыхтоўку абмену «35 на 35».

Пяцёра асуджаных у РФ украінцаў Уладзімір Балух, Павел Грыб, Мікалай Карпюк, Станіслаў Клых і Аляксандр Кольчанка былі дастаўленыя з калоній у СІЗА «Лефортава», паведаміў 20 жніўня «Мемарыял». Пазней гэтую інфармацыю пацвердзіў адказны сакратар Грамадскай назіральнай камісіі Іван Мельнікаў.

«У дачыненні да этапаваных у Маскву пяці асуджаных вырашаецца пытанне аб выдачы іх Украіне для адбыцця пакарання, прызначанага судамі ў РФ», — сказала дасведчаная крыніца «Інтэрфакса».

На наступны дзень украінскі адвакат Валянцін Рыбін, які прадстаўляе інтарэсы некаторых з затрыманых ва Украіне грамадзян РФ, паведаміў агенцтву «Інтэрфакс-Украіна», што да абмену рыхтуюць расіян Максіма Адзінцова і Аляксандра Баранава. У эфіры тэлеканала «Расія 24» ён удакладніў, што 12 расіян могуць прыняць удзел у абмене.

Пра тое, што 29 жніўня быў дастаўлены ў Маскву і ўкраінскі рэжысёр Алег Сянцоў, асуджаны па абвінавачванні ў тэрарызме,«Інтэрфаксу» паведаміла інфармаваная крыніца. А Мельнікаў паведаміў, што ў СІЗА «Лефортава» даставілі асуджанага ў Расіі за шпіянаж украінца Рамана Сушчанку.

іnterfax.ru

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: