Парламент Грэцыі ўхваліў перайменаванне Македоніі

Грэчаскія дэпутаты падтрымалі пагадненне з Македоніяй аб яе перайменаванні ў Рэспубліку Паўночная Македонія. Гэта рашэнне адкрывае Скоп'е шлях у Еўрасаюз і NАТO.

 Дэбаты ў парламенце Грэцыі аб перайменаванні Македоніі. Фота www.dw.com

Парламент Грэцыі ўхваліў пагадненне з Македоніяй аб перайменаванні гэтай краіны ў Рэспубліку Паўночная Македонія. За гэты дагавор са Скоп'е ў пятніцу, 25 студзеня, прагаласавалі 153 дэпутаты — прадстаўнікі кіруючай партыі прэм'ер-міністра Алексіса Цыпраса, а таксама некалькі незалежных парламентарыяў. Супраць выказаліся 146 дэпутатаў, яшчэ адзін устрымаўся, паведаміў старшыня парламента.

Рашэнне аб перайменаванні краіны ў Рэспубліку Паўночная Македонія парламент у Скоп'е ухваліў яшчэ 11 студзеня, адпаведныя папраўкі ў канстытуцыю падтрымала неабходная большасць дэпутатаў — дзве траціны (81 з 120).

 

Прэспанскае пагадненне

У чэрвені 2018 года прэм'ер-міністр Грэцыі Алексіс Цыпрас і яго македонскі калега Зоран Заеў падпісалі Прэспанскае пагадненне аб перайменаванні Македоніі ў Рэспубліку Паўночная Македонія. Праз некалькі месяцаў у Македоніі прайшоў рэферэндум, удзельнікі якога адказвалі на пытанне: "Ці падтрымліваеце вы ўступленне ў ЕС і NАТO, пагаджаючыся з дамовай паміж Македоніяй і Грэцыяй?"

 

Канфлікт паміж Афінамі і Скоп'е

Спрэчка вакол назвы дзяржавы Македонія паўстала ў 1991 годзе пасля абвяшчэння незалежнасці гэтай былой югаслаўскай рэспублікі. Прычына канфлікту крыецца ў наяўнасці ў складзе Грэцыі вобласці Македонія. Афіны асцерагаюцца, што ў выпадку замацавання назвы "Македонія" за суседняй краінай Скоп'е можа прад'явіць тэрытарыяльныя прэтэнзіі на грэчаскую вобласць. З-за гэтага афіцыйнай назвай Македоніі ў ААН з 1993 года з'яўляецца словазлучэнне "Былая югаслаўская рэспубліка Македонія", а Афіны блакуюць уступленне Скоп'е ў Еўрасаюз і NАТO.

Паводле www.dw.com



Хочаце ведаць больш? Сачыце за нашымі публікацыямі ў Telegram і Facebook!