Пасля пагаднення з Расіяй газ у Еўропе патаннеў

Пакуль Беларусь спрачаецца з Расіяй наконт цаны на нафту, у Еўропе патаннеў расійскі газ. 



Зніжэнне коштаў ужо адчулі еўрапейскія спажыўцы, а неўзабаве кошт газу таксама можа знізіцца ў Украіне, спадзяюцца ўкраінскія СМІ.

У Еўропе знізіліся цэны на газ пасля падпісання транзітнага кантракту паміж Украінай і Расіяй, неўзабаве кошты могуць зменшыцца і ва Украіне. Пра гэта падчас выступу на форуме ў Давосе сказаў кіраўнік Нафтагаза Андрэй Кобалеў, паведамляе Укрінфарм.

"Што мы бачым цяпер, станоўчае рашэнне канфліктнай сітуацыі прывяло да значнага зніжэння цэны на газ. Гэта адчулі многія спажыўцы ў Еўропе і, мы спадзяемся, у найбліжэйшай будучыні ўкраінскія спажыўцы таксама атрымаюць перавагі ад зніжэння цаны", — сказаў Кобалеў.

Пакуль жа з новага года цана на газ ва Украіне вырасла з 5878 грыўняў да 6600 грыўняў за тысячу кубаметраў (або прыкладна з $239 да $269).

Паводле яго слоў, Нафтагаз быў скептычна настроены да магчымасці падпісання кантракту яшчэ ў лістападзе-снежні 2019 года. "Прымальны кампраміс быў знойдзены і падпісаны", — адзначыў Кобалеў.

Да канца ацяпляльнага сезона тарыфы на газ у Украіне зафіксаваныя на ўзроўні 8 грыўняў за кубаметр для насельніцтва, або 0,69 беларускага рубля.

Беларусь таксама 31 снежня 2019 года падпісала з Расіяй пратакол аб цэнах на газ на студзень-люты 2020-га. Згодна з падпісанымі дакументамі, кантрактныя аб'ёмы паставак і транзіту ў 2020 годзе ў нашу краіну захаваныя на ўзроўні 2019 года, паведамляў "Газпрам". У 2019 годзе цана на газ для Беларусі была фіксаванай і складала $127 за 1 тысячу кубічных метраў. Аднак Расія хацела павысіць кошт газу для Беларусі ў 2020 годзе да $152 за 1 тысячу кубаметраў.

Паводле korrespondent.net

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: