Польшча сёлета пачне ўзводзіць агароджу на мяжы для спынення дзікоў

Гэта элемент барацьбы з афрыканскай чумой свіней (АЧС), якая ўяўляе смяротную пагрозу для жывёл.



Фота rcvd/pixabay.com/CC0 Public Domain

У снежні бягучага году ўздоўж усходняй мяжы Польшчы пачнецца будаўніцтва агароджы для спынення міграцыю дзікоў. Гэта элемент барацьбы з афрыканскай чумой свіней.

Згодна з пастановай ураду Польшчы, плот будзе пабудаваны ўздоўж мяжы з Расіяй (Калінінградская вобласць), Літвой, Беларуссю і Украінай.

Агулам даўжыня плоту складзе больш за 1 тыс. 200 км, паведамілі ў Міністэрстве сельскай гаспадаркі і развіцця вёскі Польшчы.

Паводле дадзеных Мінсельгасу, у тэхнічным плане гэта будзе простая канструкцыя. Плот будзе падобны на агароджы, якія сёння ўстанаўліваюцца ўздоўж аўтастрад. Улічваючы тое, што дзікі робяць падкопы для пераадолення агароджаў, ніжні элемент канструкцыі будзе ўкапаны ў зямлю.

Агароджа будзе ўяўляць драўляныя слупы з нацягнутай на іх металічнай сеткай. Яна будзе таксама пабудаваная на памежных водах, каб дзікі не перасякалі мяжу ўплаў.

Кошт інвестыцыі ацэньваецца ў 235 млн злотых (каля 56 млн еўра). Агароджа павінна быць гатовая да 2020 году.

Афрыканская чума свіней з’яўляецца смяротнай хваробай у выпадку свіней. У Польшчы вірус АЧС з’явіўся ў 2014 годзе ў свіней і дзікоў. У выніку эпідэміі для польскіх мясаперапрацоўчых прадпрыемстваў закрыты доступ на многія рынкі, напрыклад, Кітая.

Да гэтага часу на тэрыторыі Польшчы выяўлена больш за 1,5 тысячы ачагоў АЧС.

 www.radyjo.net


Хочаце ведаць больш? Сачыце за нашымі публікацыямі ў Telegram і Facebook!