Расія. Штраф за адсутнасць маскі ў транспарце Масквы складзе 5 тысяч рублёў

З 12 траўня ў грамадскім транспарце Масквы стане абавязковым насіць маскі і пальчаткі.

Фота ТАСС 

Штраф, які будзе спаганяцца з пасажыраў грамадскага транспарту ў расійскай сталіцы за адсутнасць масак і пальчатак, складзе 5 тысяч расійскіх рублёў (прыкладна 165 беларускіх рублёў), паведамляе ТАСС са спасылкай на словы начальніка Галоўкантролю Масквы Яўгена Данчыкава.

"Мэр Масквы Сяргей Сабянін агучыў, што будзе ўводзіцца масачны рэжым з 12 траўня… З моманту ўвядзення гэтых нормаў і патрабаванняў будзе прымяняцца і адміністрацыйная адказнасць да парушальнікаў. За парушэнне нормаў паводзін пры рэжыме павышанай гатоўнасці ў транспарце штраф складзе 5 тысяч рублёў, у іншых грамадскіх месцах — 4 тысячы рублёў", — сказаў Данчыкаў.

Таксама ў чацвер, 7 траўня, улады Масквы працягнулі рэжым самаізаляцыі да 31 траўня. Усе закрытыя цяпер у Маскве прадпрыемствы сферы паслуг, гандлю, адукацыі, культуры і спорту не будуць працаваць да 31 траўня, паведаміў мэр сталіцы Сяргей Сабянін.

Рэжым самаізаляцыі дзейнічае для жыхароў Масквы з 29 сакавіка. У горадзе не працуюць крамы — за выключэннем прадуктовых, што гандлююць таварамі першай неабходнасці і таварамі для жывёл, зачыненыя тэатры, рэстараны, кафэ, фітнес-цэнтры, салоны прыгажосці, забаронена наведванне паркаў і правядзенне забаўляльных мерапрыемстваў.

У сталічны Кодэкс аб адміністрацыйных правапарушэннях (КаАП) таксама былі ўнесеныя змены, якія ўстанаўліваюць адміністрацыйную адказнасць для грамадзян за невыкананне патрабаванняў рэжыму павышанай гатоўнасці, у прыватнасці, рэжыму самаізаляцыі, у выглядзе штрафу для фізічных асоб у памеры 4 тысячы рублёў, а за паўторнае парушэнне або за парушэнне з выкарыстаннем транспартнага сродку — 5 тысяч рублёў.

Паводле tass.ru


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: