У ААН прыдумалі, як абысці вета Расіі ў Радзе Бяспекі — The Guardian

Расія працяглы час блякуе ініцыятывы краінаў Захаду ў Радзе Бяспекі ААН адносна выкарыстання хімічнай зброі ў Сірыі — у краіны як пастаяннага чальца Рады ёсць права вета. Расія выстаўляе свае прапановы, але іх блакуюць заходнія краіны, пиша "Радыё Свабода".

Пасяджэнне Рады Бяспекі ААН, архіўнае фота "Радыё Свабода"


Як піша The Guardian, краіны Захаду хочуць спыніць «параліч» у ААН у сірыйскай тэме. Ідэя ў тым, каб выкарыстаць нячаста ўжыванае правіла, вызначанае яшчэ падчас халоднай вайны (рэзалюцыя Генасамблеі «Адзінства дзеля міру» 1950 года): перадаць адказнасць за вырашэнне крызісу ад Рады Бяспекі з 15 дзяржаваў да Генеральнай асамблеі 193 дзяржаваў праз «нязгоду пастаянных чальцоў» Рады.

«Расійскае права вета не павінна быць канцом намаганняў дзеля калектыўных дзеянняў з боку ААН, — расказвае былы кіраўнік Amnesty International і былы дзеяч ААН Іэн Мартын. — Абавязак патрабаваць адказнасці за выкарыстанне хімічнай зброі і пакласці канец жахам сірыйскага канфлікту ляжыць на сусветнай супольнасці як адзіным цэлым».

Ідэя была ўзнятая на сустрэчы прадстаўнікоў заходніх дзяржаваў у Радзе Бяспекі за зачыненымі дзвярыма на мінулых выходных — і, верагодна, будзе абмяркоўвацца цягам бягучага тыдня. Заходнія дзяржавы, піша The Guardian, баяцца, што адсутнасць механізму вызначэння адказнасці за хімічныя атакі дае сірыйскім уладам магчымасць працягваць ужыванне хімічнай зброі, а таксама сур’ёзна падрывае цяперашні міжнародны парадак.

***

14 красавіка пасля чарговага правалу перамоваў наконт Сірыі ў Радзе Бяспекі ААН сілы ЗША нанеслі авіяўдары па сілах Асада ў адказ на чарговую атаку з ужываннем хімічнай зброі. Пры ракетных ударах па сілах Асада, паводле ЗША, мірнае насельніцтва не пацярпела, сірыйскі ўрад не паведамляў пра чалавечыя страты, але прэзідэнт ЗША Дональд Трамп пісаў, «місія выкананая».



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: