У Албаніі адбыліся сутыкненні пратэстоўцаў з паліцыяй

Паліцыя ўжыла вадамёты і слёзатачывы газ да ўдзельнікаў антыўрадавых пратэстаў у Тыране. Апазіцыя патрабуе правесці новыя выбары. Кіруючую партыю вінавацяць у карупцыі.
Удзельнікі антыўрадавых пратэстаў у сталіцы Албаніі ўступілі ў сутыкненні з сіламі бяспекі рэспублікі. Некалькі тысяч пратэстуючых сабраліся ў суботу, 11 траўня, перад будынкам парламента ў Тыране з патрабаваннем адстаўкі старшыні Савета міністраў Эдзі Рамы. Яны сталі кідаць у паліцэйскіх бутэлькі з запальнай сумессю і петарды, праваахоўнікі ў адказ ўжылі слёзатачывы газ і вадамёты. Па словах прадстаўнікоў экстраных службаў, не менш дванаццаці супрацоўнікаў паліцыі атрымалі раненні.

Пратэсты ў Албаніі пачаліся ў лютым. Апазіцыя патрабуе правядзення новых выбараў і адстаўкі Рамы, які займае сваю пасаду з 2013 года. Кіруючую албанскую сацыялістычную партыю і яе старшыню абвінавачваюць у махінацыях на выбарах і карупцыі. У канцы лютага звыш 60 дэпутатаў ад Дэмакратычнай партыі Албаніі і яе саюзнікаў здалі свае мандаты ў знак пратэсту.

Лідар дэмакратаў Люльзім Баша асабліва вылучыў неабходнасць «вызваліць Албанію ад злачынстваў» і зрабіць яе падобнай на астатнія краіны Еўропы. Пратэстныя акцыі будуць працягвацца, а іх маштаб — расці, пакуль албанскія ўлады трымаюць краіну «удалечыні ад Еўропы», заявіў Баша, выступаючы перад дэманстрантамі.

Рэспубліка Албанія з насельніцтвам у 2,9 млн чалавек уваходзіць у лік самых бедных дзяржаў Еўропы. У 2019 годзе ўлады спадзяюцца пачаць перамовы аб уступленні ў Еўрапейскі Саюз.

dw.com

Хочаце ведаць больш? Сачыце за нашымі публікацыямі ў Telegram і Facebook!