У Еўрасаюзе забаранілі продаж ментолавых цыгарэт

З серады 20 траўня ў краінах Еўрасаюза і Вялікабрытаніі ўводзіцца забарона на продаж цыгарэт са смакам, у тым ліку, ментолавых, паведамляе bbc.com.

Акрамя цыгарэт з рознымі смакамі, з паліц крам знікнуць фільтры, папера і капсулы, якія змяшчаюць араматызатары. У Брытаніі таксама нельга будзе купіць тонкія цыгарэты. Чыноўнікі разлічваюць, што новая мера дапаможа скараціць колькасць маладых курцоў.

Як працуе большасць цыгарэт з ментолом? Часта ўнутры фільтра змяшчаецца капсула, якая ламаецца пры націску, змяняючы смак. Ці сам фільтр прамочаны ментолавым маслам, якое надае водар.

Ментол упершыню пачалі дадаваць у цыгарэтныя фільтры ў 1920-х гадах: вытворцы сцвярджалі, што такія цыгарэты больш бяспечныя для здароўя курцоў, а рэкламу сваёй прадукцыі будавалі вакол малюнкаў прыроды, прахалоднай вясны і вады.

Гэта павінна было даць пакупнікам адчуванне свежасці ад палення. Пры гэтым мэтай былі менавіта курцы-пачаткоўцы ці людзі, якія маюць праблемы са здароўем.

На самай справе па сваім уздзеянні на арганізм цыгарэты з рознымі смакамі ніяк не адрозніваюцца ад звычайных і ўсё гэтак жа спрыяюць развіццю рака і захворванняў сэрца і сасудаў.

І ўсё ж шматлікія апытанні, праведзеныя ў розных краінах, кажуць, што маладыя людзі часта ўпэўненыя, што ментолавыя цыгарэты менш небяспечныя.

Пры ўдыху ментолавы водар маскіруе пах дыму. Акрамя таго, ментол мае астуджальны эфект і можа паменшыць кашаль і непрыемныя адчуванні ў горле, якія ўзнікаюць у многіх курцоў.

Лекары лічаць, што менавіта таму моладзь верыць у меншую шкоду ментолавых цыгарэт. А даследаванні паказваюць, што па гэтай прычыне маладыя людзі часцей за ўсё купляюць ментолавыя цыгарэты.

На самай жа справе курцы часта ўдыхаюць такі дым больш глыбока, даўжэй затрымліваюць яго ў лёгкіх і падвяргаюць сябе яшчэ большай небяспецы.

Акрамя таго, калі чалавек упершыню спрабуе паліць і выбірае араматызаваныя цыгарэты, у яго нашмат больш шанцаў выпрацаваць звычку і стаць залежным ад нікаціну, чым у тых, хто спрабуе цыгарэты без смакавых дадаткаў.

Больш за тое, курцы ментолавых цыгарэт у сярэднім паляць больш астатніх і радзей хочуць кінуць. Праблема ў тым, што кінуць паліць цыгарэты з ментолом аказваецца для многіх складаней, чым у іншых выпадках: асноўная прычына — той самы больш прыемны смак.

Амерыканская даследчая кампанія праводзіла апытанне сярод людзей, якія хацелі б кінуць паліць: з аматараў ментолавых цыгарэт не змаглі расстацца з звычкай 69% апытаных, у той час як сярод тых, хто паліць цыгарэты без дадаткаў такіх 54% .

Фармальна закон аб забароне продажу араматызаваных цыгарэт быў прыняты яшчэ ў 2016 годзе, гэта значыць да Брэксіту, але Брытанія вырашыла прызнаць яго актуальным, таму, як і ва ўсіх краінах ЕС, ён уступае ў сілу 20 траўня.

1 кастрычніка 2017 года продаж ментолавых цыгарэт цалкам забараніла Канада. Эксперты Цэнтра па кантролі і даследаваннях тытунёвай прадукцыі з самага пачатку забароны сачылі за сітуацыяй у краіне і ў чэрвені мінулага года апублікавалі свае высновы.

Эксперты прыйшлі да высновы, што забарона на ментолавыя цыгарэты прывяла да таго, што праз год пасля ўступлення закона ў сілу вялікая колькасць людзей адмовілася ад курэння зусім або пачалі рабіць больш актыўныя спробы кінуць.

63% людзей, якія да гэтага штодня палілі ментолавыя цыгарэты, паспрабавалі кінуць паліць пасля прыняцця закона, а 24% атрымалася цалкам адмовіцца ад нікаціну.

Гэтыя лічбы не занадта ўразілі іспанцаў, якія, па паведамленнях СМІ, жорстка выступілі супраць забароны на ментолавыя цыгарэты.

Па дадзеных Міністэрства аховы здароўя краіны, 34% іспанцаў ва ўзросце ад 15 да 64 гадоў паляць штодня. Пры гэтым ментолавыя цыгарэты — рэгулярна або зрэдку — купляюць каля 350 тыс. іспанцаў.

Урад Іспаніі з 20 траўня прыраўноўвае продаж ментолавых цыгарэт да сур'ёзнага злачынства — парушальнікам пагражае штраф да 10 тысяч еўра.


Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: