У Францыі памерла дзіця з рэдкім сіндромам, які мог быць выкліканы каронавірусам

У Францыі дзевяцігадовае дзіця памерла ад запаленчага сіндрому, падобнага на сіндром Кавасакі. У дзіцяці быў каронавірус. Пра гэта 15 траўня паведаміла газета La Provence. Раней спецыялісты казалі аб магчымай сувязі гэтай рэдкай дзіцячай хваробы з COVID-19.
Паведамляецца, што дзевяцігадовае дзіця памерла ў бальніцы Марсэлю. Гэтую інфармацыю агенцтву AFP пацвердзіў кіраўнік педыятрычнага аддзялення рэанімацыі марсельскага бальніцы Фабрыс Мішэль.

Па словах Фабрыса Мішэля, у дзевяцігадовага дзіцяці спынілася сэрца, калі яно знаходзілася дома. Дзіця шпіталізавалі ў спецыялізаванае аддзяленне, дзе яно правяло сем дзён. Лекар паведаміў, што пацыент памёр у мінулую суботу ад «неўралагічных пашкоджанняў» пасля спынення сэрца.

Нацыянальнае агенцтва па ахове здароўя адзначае, што ў дзіцяці мелася спадарожная паталогія нервовай сістэмы. Аналіз крыві паказаў, што ў яго быў каронавірус, але не было сімптомаў COVID-19.

З 1 сакавіка па 12 мая ў Францыі ў дзяцей зафіксавалі 125 выпадкаў небяспечнага запаленчага сіндрому, які можа прывесці да праблем з сэрцам. Сярод іх у 52% аналізаў далі станоўчы вынік на каронавірус. Сімптомы, падобныя на сіндром Кавасакі, выяўлялі ў дзяцей усіх узростаў — ад аднаго года да 14 гадоў. У іх назіралася ліхаманка, боль у жываце, скурныя высыпанні, кан'юктывіт, пачырваненне і раздзьмутыя языкі. У Агенцтве па ахове здароўя адзначаюць, што праблемы з сэрцам і запаленчыя працэсы «значна больш выяўленыя» ў выпадках падазрэння на COVID-19.

Адмыслоўцы не выключаюць, што гэтыя сімптомы могуць быць праявай цяжкай плыні COVID-19 у дзяцей, якія ў пераважнай большасці пераносяць каронавірус бессімптомна. Аб падобных выпадках паведамляюць у іншых краінах.

Кіраўнік СААЗ Тедрас Аданам Гебрэйесус на штотыднёвым брыфінгу ў пятніцу заклікаў лекараў усіх краін звярнуць асаблівую ўвагу на гэтыя паведамленні.

«Вельмі важна тэрмінова і старанна вывучыць гэты клінічны сіндром, зразумець прычынна-выніковую сувязь і апісаць яго лячэнне ... Я заклікаю лекараў усяго свету супрацоўнічаць з органамі ўлады і СААЗ, каб яны былі напагатове і ведалі пра небяспеку гэтага сіндрому ў дзяцей», — сказаў кіраўнік СААЗ. Па словах Гебрейесуса, СААЗ ўжо распрацавала папярэдняе вызначэнне для гэтага сіндрому і форму справаздачы аб яго зафіксаваных выпадках.

tut.by

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: