У Літве нелегальныя мігранты ўчынілі бунт: выкінулі ежу і патрабуюць іх выпусціць

26 ліпеня з раніцы ў былой Верабейскай школе (Алітускі раён, Літва) пачаўся бунт нелегальных мігрантаў. Яны адмовіліся выконваць патрабаванні сілавікоў, піша «Delfi».

Канфлікт узнік пасля таго, як іракцы забаранілі іншым мігрантам браць дастаўленую ежу. «Усё пачалося раніцай, калі не дазволілі раздаваць мігрантам прывезеную ежу. Ежу не дазволілі браць нават дзецям і падлеткам, а таксама жанчынам. Цяпер прывезлі абед, і яго не даюць раздаваць», — сказаў намеснік дырэктара адміністрацыі Алітускага муніцыпалітэта Віргіліюс Пранскявічус.

Паводле слоў мэра Алітускага раёна Альгірдаса Урубляўскаса, незадаволенасць сярод мігрантаў пачала выяўляцца яшчэ ў мінулую пятніцу — пасля таго, як туды прыехалі журналісты. Мігранты патрабавалі даць ім лекара і вярнуць тэлефоны.

Паводле слоў Пранскявічуса, у выхадныя мігранты трохі супакоіліся, бо ім абяцалі, што іх патрабаванні разгледзяць адказныя асобы.

«Але ад сённяшняй раніцы і гаворкі няма пра перамовы. Яны выкінулі ежу. Самі іракцы есці адмаўляюцца, яны забаранілі і іншым браць ежу. Адзінае патрабаванне — выпусціць іх з тэрыторыі», — сказаў ён.

«Там усюды смецце, у туалетах экскрэменты льюцца праз край, мігранты не пускаюць работнікаў чыніць каналізацыю. Цяпер мы і самі баімся пасылаць туды работнікаў, гэта небяспечна», — сказаў Пранскявічус.

Зараз у Верабеяі дзяжураць 16 супрацоўнікаў Службы грамадскай бяспекі Літвы. Яны працуюць у жудасных умовах: дзяжураць 8 гадзін, потым там жа адпачываюць у спальных мяшках ля плота. Потым — зноў дзяжурства. У іх нават няма нармальных умоў для падтрымання гігіены.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: