У Польшчы пачнецца суд за гандаль людзьмі. Пацярпелі некалькі тысячаў беларусаў і ўкраінцаў

Акруговая пракуратура Варшавы накіравала ў суд справу аб гандлі людзьмі. Двое абвінавачаных ад ліпеня 2015 да кастрычніка 2016 года наймалі беларусаў і ўкраінцаў на працу ў грамадскім харчаванні і ўтрымлівалі іх у рабскіх умовах, паведамляе Радыё Свабода.
Пра гэта піша сайт акруговай пракуратуры Варшавы. Як высветліла пракуратура, Барыс С. і Міраслаў К. — арганізатары злачыннай схемы — карысталіся крытычным фінансавым становішчам людзей, вербавалі іх у Беларусі і Украіне, а затым прывозілі іх у Польшчу пад выглядам надзейнай і добрааплатнай працы.

Завербаваныя замежнікі, не ведаючы як дзейнічаюць у Польшчы законы аб працаўладкаваньні, былі вымушаныя працаваць ва ўстановах грамадскага харчавання ў Варшаве па 350 гадзін на месяц. Праз шматлікія «штрафы», заробак ім плацілі не своечасова і не ў поўным аб’ёме. Пры гэтым людзі баяліся звяртацца ў праваахоўныя органы, баючыся страціць ужо заробленыя грошы.

На нанятых беларусаў і ўкраінцаў таксама аказвалі псіхалагічны ціск. Некаторых прымушалі падпісваць распіскі аб атрыманні грошай у доўг, чым яшчэ больш заганялі ў фінансавую залежнасць. Людзі жылі ў гатэлях для рабочых і на прыватных кватэрах на тэрыторыі Варшавы, арандаваных арганізатарамі злачынства. Жыллёвыя ўмовы ў гэтых памяшканнях следчыя назвалі «скандальнымі». Акрамя таго, іх жыццё было пад поўным кантролем гандляроў людзьмі.

Падазраваны, Барыс С., прызнаў цалкам віну і патлумачыў схему, па якой працавала арганізацыя. Ён пачаў працу ў рэстарацыі Міраслава К. у 2015 годзе спачатку як звычайны рабочы. Потым Міраслаў К. прапанаваў яму пасаду «наглядчыка» над іншымі рабочымі. Сам Міраслаў не прызнае віну.

Арганізатарам пагражае да 15 гадоў зняволення.

Хочаце ведаць больш? Сачыце за нашымі публікацыямі ў Telegram і Facebook!