У Расіі стартавалі другія туры губернатарскіх выбараў

У двух рэгіёнах Расіі 23 верасня праходзяць другія туры губернатарскіх выбараў. Канчаткова вызначыцца з тым, хто будзе ўзначальваць іх рэгіён, павінны жыхары Хабараўскага края і Уладзімірскай вобласці.
Фота: korolevtimes.ru

Фота: korolevtimes.ru

У Хабараўскам краі ў другі тур выбараў выйшлі дзеючы кіраўнік рэгіёна Вячаслаў Шпорт і кандыдат ад ЛДПР Сяргей Фургал. Падчас галасавання 9 верасня яны набралі 35,62% і 35,81% адпаведна.

Ва Уладзімірскай вобласці праціўнікам дзеючага губернатара ад «Адзінай Расіі» Святланы Арловай таксама стаў кандыдат ад ЛДПР — Уладзімір Сіпягін. У першым туры выбараў Арлова набрала 36,42% галасоў супраць 31,36% у Сіпягіна.

Паўторнае галасаванне таксама павінна было прайсці ў Хакасіі. Аднак 21 верасня ўвечары дзеючы кіраўнік рэгіёна з «Адзінай Расіі» Віктар Зімін зняў сваю кандыдатуру. У другім туры ён павінен быў сустрэцца з супернікам ад камуністаў Валянцінам Канавалавым. 9 верасня Зімін, які набраў 32,4% галасоў, апынуўся на другім месцы, саступіўшы Канавалаву (44,81%).

У сувязі з адмовай Зіміна ад удзелу ў галасаванні выбаркам рэспублікі перанёс другі тур на 7 кастрычніка. Супернікам Канавалава стане кандыдат, які заняў трэцяе месца.

Рашэнне зняцца з выбараў Зімін патлумачыў станам здароўя. У той жа час некалькі крыніц РБК паведамілі, што прычынай стаў званок з Крамля ў сувязі з адсутнасцю шанцаў на перамогу.

16 верасня другі тур губернатарскіх выбараў прайшоў у Прымор'і. Падчас падліку да апошняга моманту лідзіраваў кандыдат-камуніст. Аднак пасля апрацоўкі 99% пратаколаў дзеючы кіраўнік рэгіёна ад «Адзінай Расіі» раптам вырваўся наперад.


Паводле nn.by

Хочаце ведаць больш? Сачыце за нашымі публікацыямі ў Telegram і Facebook!

Каментаваць