Украіна ўвяла санкцыі супраць Эрмітажа і іншых расійскіх устаноў

Улады Украіны пашырылі санкцыі ў дачыненні да расійскіх арганізацый, а таксама ўстаноў акупаванага Крыма.
Украіна ўвяла санкцыі ў дачыненні да шэрагу расійскіх музеяў, вышэйшых навучальных устаноў, навуковых устаноў і грамадскіх арганізацый. Указ аб штрафных мерах тэрмінам на 3 гады падпісаў 14 мая прэзідэнт краіны Уладзімір Зяленскі.

Пад санкцыі трапілі, у прыватнасці, Дзяржаўны Эрмітаж, Музей выяўленчых мастацтваў імя Пушкіна (Масква), Маскоўскі дзяржаўны універсітэт імя Ламаносава, Рускае геаграфічнае таварыства, Акадэмія навук Татарстана, шэраг інстытутаў Расійскай акадэміі навук. Акрамя таго, у чорным спісе апынуліся шэраг устаноў анэксаванага Расіяй Крыму: Гісторыка-археалагічны музей-запаведнік «Неапаль Скіфскі», Крымскае археалагічнае таварыства, Крымскі федэральны універсітэт імя Вярнадскага і іншыя.

Кіеў заблакаваў актывы гэтых устаноў на тэрыторыі Украіны, спыніў культурны абмен, навуковае супрацоўніцтва і іншыя кантакты, ануляваў афіцыйныя візіты, пасяджэнні і перамовы.

Санкцыі ў дачыненні да расійскіх СМІ і сацсетак


Акрамя таго, у чорны спіс уключаны яшчэ 28 крымскіх і маскоўскіх медыякампаній, у тым ліку выдавецкі дом «Комсомольская правда». Зяленскі падоўжыў на тры гады санкцыі ў дачыненні да расійскіх тэлеканалаў, у прыватнасці, «НТВ-Плюс» і «Першага канала», а таксама ў дачыненні да расійскіх сацсетак Mail.ru, «Укантакце» і «Аднакласнікі». На тры гады падоўжаныя ўкраінскія штрафныя меры ў дачыненні да расійскай кампаніі «1С», на адзін год — у дачыненні да расійскай «Карпарацыі Ветразь» і яе ўкраінскіх падраздзяленняў.

Адначасова з чорнага спісу выключаныя дзевяць фізічных асоб, сярод іх тры грамадзяніна РФ — заснавальнік IT-кампаніі Lucky Labs Сяргей Токараў, экс-уладальнік футбольнага клуба «Дынама» (Масква) Аляксей Федорыч і прадпрымальнік Карэн Грыгаран. Санкцыі знялі таксама з ўнучкі італьянскага дыктатара Беніта Муссолі  былога дэпутата Еўрапарламента Алесандры Мусаліні і з пяці украінак, якія ўваходзілі ў «выбарчыя камісіі» самаабвешчаных ДНР і ЛНР.

У сакавіку 2019 года Эрмітаж заявіў пра гатоўнасць прадставіць у Татарстане экспанаты з крымскіх музеяў, нагадвае агенцтва «Украінскія Навіны», а ў траўні міністэрства па пытаннях часова акупаваных тэрыторый і ўнутрана перамешчаных асоб Украіны выступіла з ініцыятывай увядзення санкцый за незаконныя раскопкі на тэрыторыі анэксаванага паўвострава.

dw.com

Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

Больш цікавага на «Новым Часе»: