Вынікі выбараў у Маскве. У апазіцыі — амаль палова месцаў, лідар «Адзінай Расіі» прайграў

Сістэмная апазіцыя атрымала 20 з 45 месцаў у Маскоўскую гарадскую думу.

Андрэй Васільеў / ТАСС / Scanpix / LETA

На выбарах у парламент Масквы, якія прайшлі 8 верасня, КПРФ перамагла ў 13 акругах, «Яблоко» — у чатырох, «Справядлівая Расія» — у трох. Такія вынікі пасля апрацоўкі 100% пратаколаў, паведамляе meduza.io

Кандыдаты ад улады ў гардуме Масквы — гэта дзевяць чальцоў фракцыі «Адзіная Расія», якія ішлі самавылучэнцамі, а таксама трое дзеючых парламентарыяў з праўладнага аб'яднання «Мая Масква». Акрамя таго, у парламент прайшлі трынаццаць кандыдатаў, якіх, паводле дадзеных «Медузы» і «Рускай службы ВВС», падтрымлівае мэрыя Масквы.

У парламент Масквы патрапілі 20 кандыдатаў «Разумнага галасавання» — праекта заснавальніка Фонду барацьбы з карупцыяй (ФБК) Аляксея Навальнага, скіраванага супраць кандыдатаў ад улады. Ноччу 9 верасня Навальны паведаміў у твітары, што «Адзіная Расія» прайграла ў 24 акругах з 45, але «з дапамогай фальсіфікацый» у чатырох кандыдатаў «скралі мандаты». «У любым выпадку, гэта фантастычны вынік “Разумнага галасавання”», — лічыць расійскі апазіцыянер.

Кіраўнік «Адзінай Расіі» ў Маскве Андрэй Мяцельскі прайграў выбары. Ён не змог пераабрацца ў парламент, дзе засядаў з 2001 года. У 15-й акрузе Мяцельскі саступіў камуністу Сяргею Савасцьянаву. Перад выбарамі ФБК выпусціў два расследавання пра бізнес Мяцельскага і нерухомасць яго сям'і. Да таго, як сталі вядомыя вынікі галасавання па 15-й акрузе, сакратар генсавета «Адзінай Расіі» Андрэй Турчак сказаў, што яго партыя «жахнула на этих выборах всех». Раніцай 9 верасня Турчак сказаў, што лічыць паразу Мяцельскага «непрыемнай». Нягледзячы на ​​гэта, ён захавае месца ў партыі.

Падчас інтэрнэт-галасавання здарыўся тэхнічны збой. Эксперыментальнае электроннае галасаванне адбывалася ў трох акругах Масквы — у першай, дзясятай і трыццатай. З-за збою частка выбаршчыкаў не змагла прагаласаваць праз інтэрнэт. Пры гэтым агульная яўка на электронным галасаванні склала 90,8%. Ва ўсіх трох акругах перамаглі кандыдаты ад улады. У незарэгістраванай Лібертарыянскай партыі Расіі лічаць, што з-за збою ў працы электроннага галасавання прайграў Раман Юнеман — незалежны кандыдат, які збіраў подпісы пры падтрымцы ФБК (не ўваходзіў у лік кандыдатаў ад «Разумнага галасавання»). Для перамогі яму не хапіла 84 галасы.

Яўка на выбарах склала 21,77%, паводле дадзеных пасля апрацоўкі 100% пратаколаў. Гэта параўнальна з вынікамі яўкі на выбарах у Масгардуму ў 2014 годзе, калі прагаласавалі 21,04% выбаршчыкаў.


Хочаце ведаць больш? Сачыце за нашымі публікацыямі ў Telegram і Facebook!