Забойства Шарамета: Украіна просіць 4 краіны праверыць версію аб беларускім следзе

Украінскае следства ў справе аб забойстве журналіста Паўла Шарамета просіць іншыя краіны праверыць версію аб беларускім следзе. У прыватнасці, запыты разаслалі чатыром краінам.
Павел Шарамет. Фота: ms.detector.media

Павел Шарамет. Фота: ms.detector.media

Пра гэта ў інтэрв'ю censor.net распавёў намеснік кіраўніка Нацыянальнай паліцыі Украіны Максім Цуцкірыдзе.

Паводле яго слоў, беларускі след застаецца адной з версій забойства Шарамета з улікам яго крытычных выказванняў у дачыненні да дзейнага рэжыму.

"Цяпер міжнародныя даручэнні накіраваныя ў Рэспубліку Беларусь, Літву, Злучаныя Штаты Амерыкі, Расійскую Федэрацыю. Чакаем іх выканання, каб пацвердзіць або абвергнуць версію пра магчымы беларускі след у справе Шарамета", — адзначыў Цуцкірыдзе.

Нагадаем, Павел Шарамет загінуў раніцай 20 ліпеня 2016 года ў цэнтры Кіева ў выніку выбуху аўтамабіля. На сёння ў справе фігуруюць тры чалавекі — музыкант і былы вайсковец Андрэй Антоненка, медык Юлія Кузьменка і валанцёр Яна Дугар. Усе яны ўжо знаходзяцца не пад вартай.

Чуткі пра беларускі след актывізаваліся, калі былы афіцэр Ігар Макар апублікаваў запіс размоў КДБ Беларусі пра варыянты ліквідацыі Шарамета.

rbc.ua

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: