Жазэп Барэль распавёў пра чатыры крокі ЕС у адказ на дзеянні ўладаў Беларусі

Кіраўнік еўрапейскай дыпламатыі Жазэп Барэль распавёў, якія напрамкі дзеянняў у дачыненні да Беларусі абмяркоўвае ЕС. Таксама ён заявіў, што гатовы прыехаць у Мінск, каб дапамагчы развязаць палітычны крызіс. Беларускай тэме ён прысвяціў свой блог на сайце Еўрапейскай службы знешніх сувязяў.


Па словах Барэля, на нарадзе міністраў замежных спраў ЕС 21 верасня абмяркоўваліся чатыры галоўныя напрамкі дзеяння ў адказ на дзеянні беларускіх уладаў.

Першы — пакет санкцый за фальсіфікацыю выбараў і рэпрэсіі супраць мірных грамадзянаў. У яго ўжо ўключаныя каля 40 асоб і арганізацый. Па словах Барэля, прадугледжваецца замарозка іх рахункаў і актываў у Еўрасаюзе, немагчымасць атрымаць фінансаванне ад ЕС, а таксама забарона на ўезд у ЕС.

Другі — праца па стварэнні ўмоваў для нацыянальнага дыялогу. На думку Барэля, у гэты працэс трэба ўключыць Каардынацыйную раду, якая патрабуе новых, свабодных і сумленных выбараў з прыцягненнем міжнародных назіральнікаў.

Дыпламат згадаў, што Лукашэнка адмаўляецца ад кантактаў з апазіцыяй і еўрапейскімі пасярэднікамі. Ён падтрымаў запуск Маскоўскага механізму АБСЕ — місію экспертаў па пошуку фактаў меркаваных парушэнняў правоў чалавека. «Мы таксама падтрымліваем прапанову бягучага і будучага старшыняў АБСЕ, Албаніі і Швецыі, адправіцца ў Мінск. Я гатовы паехаць у Мінск, калі гэта можа спрыяць прагрэсу», — заявіў Барэль. Пры гэтым ён падкрэсліў, што ЕС не плануе ўмешвацца ва ўнутраныя справы Беларусі, а сам ён рэгулярна кантактуе з кіраўніком МЗС Расіі Сяргеем Лаўровым.

Трэцім напрамкам дзеянняў Барэль назваў перагляд узаемаадносін Беларусі і ЕС, у тым ліку ў рамках «Усходняга партнёрства». Па яго словах, Еўрасаюз плануе падтрымліваць грамадзянскую супольнасць і незалежныя СМІ ў нашай краіне, пашырыць кантакты са студэнтамі і спрыяць студэнцкаму абмену паміж Беларуссю і ЕС.

Чацвёрты напрамак — фінансавая падтрымка беларусаў. Барэль падкрэсліў, што Еўракамісія вылучыла 53 мільёны еўра на гэтыя мэты. Раней ужо згадвалася, што 50 мільёнаў еўра з гэтай сумы пойдуць на ліквідацыю наступстваў пандэміі COVID-19. Таксама мяркуецца выдаткаваць сродкі на развіццё грамадзянскай супольнасці і незалежных СМІ ў краіне.

Як паведамлялася раней, на пасяджэнні міністраў замежных спраў у Бруселі 21 верасня рашэнне пра санкцыі супраць беларускіх чыноўнікаў так і не ўдалося прыняць. Супраць выступіў Кіпр: ён патрабуе, каб адначасова ЕС прыняў санкцыі супраць Турцыі, якая вядзе здабычу газу ў кіпрскай эканамічнай зоне Усходняга Міжземнамор’я.

Паводле Еўрарадыё



Хочаце ведаць больш? Сачыце за нашымі публікацыямі ў Telegram і Facebook, падпісвайцеся на наш канал у Яндэкс Дзэн!

  • Апошняе на сайце
,

Больш цікавага на «Новым Часе»: